Pormetxeta plaza

Barakaldoko erdigunearen eta Urban-Galindoren artean dago Pormetxeta plaza. Bi espazio horiek lotzen ditu, eta itsasadarraren ingurura hurbiltzea errazten die barakaldarrei. Diseinu berritzaile eta abangoardista du plazak. Egoteko eta paseatzeko espazio gisa konfiguratuta dago, baina, horrez gain, bere inguruko konektagarritasuna eta irisgarritasuna nabarmen hobetzen du. Obra horren aurretik, oso bide irisgaitza zen Pormetxeta kalea. Aldapek % 23rainoko pendiza zuten; hortaz, defizit hori zuzentzea zen lehentasunetako bat. Eraikitako oinezkoen arrapalek aukera ematen dute Urban-Galindoko hainbat guneren artean igarotzeko, Pormetxeta kaletik abiatuta. Hortaz, konponbidea eman die lehenago zeuden konektagarritasun- eta irisgarritasun-arazoei. Javier Fresneda, Javier San Juan eta Javier Peña dira jarduketa garatu duen taldeko kideak. Arkitekto gazteentzako Europan 6 lehiaketaren bidez eskuratu zuten proiektua.